點點心點心專門店 (Closed)

晚餐無乜地方有得食點心，咁啱行開沙田就去左點點心。食飯時間等左10分鐘左右，等嘅時候最啱就揀定食乜啦~每張枱有一壺茶，每位$4茶錢最先上枱係叉燒腸，腸粉比較厚身，料都唔少。枱面有豉油，落幾多自己中意。蟹子燒賣正正常常，中間粒蝦肉唔會’淋’哂無味。流沙包好好食！中間真係會流出黎，味道唔會太甜，食嘅時候要小心流哂啲餡😂👍🏻👍🏻👍🏻珍珠雞細細隻，一人一隻份量啱啱好，味道偏濃，有肉有蛋黃。湯餃除左有主角，仲有竹笙，隻餃都有兩隻湯匙咁大。鮮竹卷有啲失望，雖然料多，有菇有菜，但係好咸，如果味道淡返啲就好。