和牛燒肉一郎 (百誠大廈)

Open Now

Now Closed

星期日係同男朋友嘅拍拖四週年紀念，最後決定揀間高質嘅放題慶祝一下，所以二訪呢間和牛燒肉一郎，上次食過幾滿意。我哋揀咗288蚊嘅套餐，有97種食物同可以食足100分鐘，啱啱好遇到係星期日所以有炸物自助無限食。喺咁多食物入面，令我最有印象嘅食物就係薄炙牛五花，因為薄切所以烤起令成片肉嘅邊邊位烤到脆脆地，脂肪亦好均勻，所以食落唔會覺得好油膩，再沾埋燒肉醬一齊食就更正。試埋宮崎南蠻炸雞飯卷，師傅包得唔會太鬆散，入面有一粒細細粒嘅炸雞夾喺飯團內，每啖飯卷都可以咬到脆口嘅炸雞，真係好好味呀。我哋又去咗蔬果區攞咗啲菠蘿同翠肉瓜嚟烤嚟解解膩，始終唔可以成日淨係食肉嘛！我哋仲叫咗一碗香蔥海苔溫泉蛋撈飯，溫泉蛋嘅蛋液拌埋海苔同飯，呢個配搭真係幾好好味，味道就以海苔嘅香味為主。我哋去到炸物區見到日式炸雞就好吸引，仲攞咗啲返嚟食，我真係好想問廚師炸雞粉用嘅係咩品牌，真係好香脆。