麥田廚房 (Closed)

由於响銅鑼灣鬧市暫時諗唔到食乜，我仍然係响Openrice搜尋呢區，集中搵西餐，結果就嚟咗“麥田廚房”。餐牌日日唔同，主菜要咗俄式串燒魚配俄菜飯、揀咗羅宋湯。羅宋湯濃稠杰身，以番茄、薯仔、紅菜頭、蘿蔔、牛腩淆成，唔太辣之餘充滿甜味，牛腩腍滑唔韌有濃郁肉味。主菜嘅俄式串燒龍俐柳，質感略散，且較油，但洋蔥燒香咗充滿甜味，條魚又微焦，味道幾好。據侍應講解，俄菜飯係蘿蔔絲同香料撈成，食落幾易接受同入口。少有突然想食甜嘢嘅我，查詢當日甜品，同一位女侍應記得我嘅主菜要飯較滯膩，建議要柚子芝士餅。芝士餅入口充滿清新柚子味，質感冇New York Cheese Cake咁硬實，但又唔會太鬆散，非常討好。再飲啖咖啡，即時令原本帶澀嘅咖啡變得順滑濃郁。第一次覺得coffee & cake原來可以產生強烈嘅正面化學作用！☕➕🍰=😄餐廳侍應非常專注，問嘢答到之餘仲識比提議客人。我好努力舉機抄高影緊餐枱紙嘅時候，另一位男侍應行過嚟話比張我等我唔使影得咁辛苦。好貼心😱呢條街接近銅鑼灣邊位遠離市中心，感覺上好寧靜。同一條街仲有好多嘢食，又多一個新點比我慢慢探索。