小飛象葡國燒烤餐廳 (Closed)

上個星期本想去雲來打邊爐, 點知去到樓下發覺價錢都唔平, 好似唔係好抵食, 於是乎就即刻轉場, 師傅見到呢間食店又好似幾好咁, 所以決定黎呢度試下!入到去人唔算多, 被安排於一張卡位, 不過卡位比較窄, 坐得就唔算舒服! 不過唔理咁多, 兩口子商量左一陣, 最後叫左芝士焗青口, 蒜香焗田螺, 芝士焗生蠔同埋香檸煙鴨胸!先講下個芝士焗青口, 芝士焗青口一碟有六隻, 芝士焗得好香, 而青口就好新鮮, 焗後一d都唔老, 仲有d汁, 加上薯蓉整得好蓉好入味, 好得; 蒜香焗田螺一碟有六隻, 田螺都幾大隻而且幾鬆身, 薯蓉又係好好味, 正呀; 芝士焗生蠔一碟得兩隻, 芝士都幾多不過生蠔就老左少少有d韌, 加上唔算好靚, 苦苦地咁, 一般; 香檸煙鴨胸一碟有好多件鴨胸, 鴨胸都算鬆但就比較咸, 而香檸汁太濃, 一d都唔好味, 係全晚最差一道菜!總括黎講食物質素尚算不過不失, 環境一般, 服務都係普普通通, 不過入黎食完後師傅發覺都唔知邊忽似葡國餐廳? 似一間普通餐廳多d, 如果當呢間食店係一間普通餐廳, 師傅相信仲有機會再黎, 否則可免則免!