Cafe 1950歐陸餐廳 (Closed)

老媽子無煮飯，我地就唯有自己落街搵野食啦~ 但有時呢啲咁ad hoc 嘅「無飯主意」，真係要對自己好啲，所以就去附近啲商場搵左間歐陸嘅餐廳食，係，的而且確歐陸唔係主因，其實係因為門面大大隻字寫住「無限添飲」而吸引到我。晚巿店員拎左個羅宋湯俾我，老實講，呢個湯太稀，無乜茄味，不過味道其實唔差，好有屋企煲嘅感覺，而且再望下其實啲料都算唔少，作為餐湯你仲想佢點? 之後又貪貪地心叫左個白酒忌廉藍青口，大佬~ $72 jar 喎! 就算同圖有差異，都應該唔差得遠啦~ 一上枱，個份量同賣相又真係唔差喎!!! 忌廉灑得幾靚，面頭又有幾片洋葱，而家住係啲屋村有呢啲咁嘅靚野食，都真係唔錯~ 仲有啲香草伴碟添~ 以前係呢個商場，多數都係得啲快餐店，尤其記得嗰間金城....好難食服務差，但你無得揀，而家總算多啲選擇囉~  嗱~ 不過咁.... 佢啲青口肉呢，係成粒蠔屎咁，你又真係無諗過佢係正常嘅一半大小，而且啲汁又無乜味，同食白灼嘅差唔多。嗱~ 之但係呢~ 呢度新推嘅韓式拉芝士辛辣泡菜雞肉石板飯就真係驚喜勒! 你又真係無諗過咁多芝士碎，仲熱騰騰咁上碟，啲芝士不停咁bilibala咁~ 大家睇下我條片就知幾震