豐鍋雞煲 (荔枝角道) (Closed)

好耐冇同哥哥食飯，今日放早去深水埗接佢收工，順便撐下枱腳，食個雞煲麻甩一番。食材選擇眾多，特別係牛嘅選擇，除咗一般嘅雪花肥牛、安格斯牛同牛柳粒，仲有手切牛頸脊、牛花𦟌同牛胸爽呢啲比較少見嘅部位，牛魔王千祈唔好錯過！另外有好多自家製食材，例如手工丸、韭菜餃、麻辣雲吞同即炸響鈴，睇得出好有心機👍🏻前菜有酸蘿蔔，相當開胃。麻辣雞煲同椰子雞煲同樣吸引，最後我哋叫咗麻辣雞煲半隻(小辣)，一上枱已經香噴噴，面頭仲有大量芫茜。侍應會即場翻炒雞煲，香氣四溢，大概炒三次之後就可以開餐。醬汁香濃，帶有淡淡嘅麵豉醬味，既香又麻，相當惹味👍🏻雞肉有彈性，肥瘦適中，醬汁亦入味👌🏼牛柳粒份量雖然唔算多，但勝在肉味濃郁，油脂豐富😉響鈴係即叫即炸，上枱嘅時候仲「吱吱」聲，新鮮滾熱辣，好有效果😃用筷子一夾已經感覺到有幾鬆脆，放落湯底浸三至四秒就食得，外皮微軟而且索哂湯底嘅味道，內裡仍然香脆，點睛之筆係第一二層中間包住嘅芝士，浸落熱湯後剛好溶化，香濃嘅芝士味加上麻辣湯底竟然毫無違和感😃油麥菜鮮嫩翠綠，落湯後冇咁容易老，個人認為比生菜更適合用嚟打邊爐。打邊爐又點少得凍飲，水蜜桃梳打清爽解辣，而烏梅汁就酸酸甜甜，非常開胃消滯