籠太子點心專門店

Open Now

Now Closed

金錢肚：正正常常，都入味，不過有啲啲韌。叉燒腸：腸粉上枱已切好，腸粉算滑，粉皮厚度正常，芫茜分佈不勻，得一兩舊有。南瓜煎堆仔：有4粒喎，南瓜本身夠甜，係即叫即炸，外皮鬆脆，就算等左陣先食都唔會凹左。荷葉乳鴿飯：其實冇乜荷葉味，乳鴿睇落得半隻，肉切得太細，蒸完啲肉又細粒又韌，好失望，飯本身有味，加埋豉油冇肉都食到嘅。香滑反斗糕：睇名真係唔知係乜，但見有個推介👍，問左店員佢話當馬拉糕，咁我鐘意食馬拉糕就即管叫啦。結果好伏😭，四舊雞蛋糕仔，外型又唔靚，食落又實淨，仲要冇餡，請問邊度香滑？如果似馬拉糕質感我都可以接受，但冇囉。鵪鶉蛋燒賣：底下肉質味道不錯，但唔知點解鵪鶉蛋面頭有個膠膠地嘅透明外殼，好似係鵪鶉蛋白形成，真係太實淨，唔想吞落肚。去得點心專門店都係鐘意佢啲點心即叫即蒸，其實嚟錯，不過今日有幾款中伏，食大路野應該好啲。