西鐵燒烤樂園 (Closed)

喺元朗西鐵站一出去1分鐘都唔洗就到嘅BBQ場，地點嚟講真係好方便！由G出口一出過埋天橋，就會見到佢地嘅門牌，所以好易認。入去前先要比$130蚊入場費(星期一至五收費)，價錢嚟講都唔算費。比咗錢之後，會拎到一張入場卷，除咗燒野食嘅食物之外，包一支水同一罐汽水，同埋無時間限制，呢點值得一讚。入到去有人幫我哋開爐，好輕鬆咁就可以燒得野食！環境方面，都算衛生同乾淨，仲有好多大電視比客人一邊睇電視一邊傾下計咁！唔錯！食物方面，選擇好多！一般嘅丸類﹑腸仔﹑牛豬雞扒﹑雞翼﹑牛仔骨等都會有，應有盡有！食物質素都唔錯，啲醃製食物唔會太咸，特別推薦喺雞翼同牛仔骨，麻辣雞翼唔會太辣得嚟又醃得好入味，牛仔骨嘅黑椒味都好香好入味！丸類方面，基本嘅魚蛋﹑墨魚丸﹑貢丸﹑牛丸同龍蝦丸都會有，唔會話好特別，但都過得去！出到去比個大碟你同佢地講要咩，佢地會幫你夾，可能因為驚會食剩嘅關係，所以佢地本身夾得唔多，可能食完之後要分幾轉出去再拎～不過另外有啲食物都可以自己拎嘅，例如麵包﹑茄子。所以都算係方便嘅！整體黎講都算唔錯！最滿意都係地理位置！真係好方便！