Video
Read full review
2014-06-27
831 views
小肥喺灣仔工作，因健康理由，午餐大多帶飯，但有時都會出去試區內o既不同食肆。上星期四，碰巧honey喺金鐘附近做完野，經過一間酒吧，見其易拉架廣告正在推廣越式午市套餐，覺得幾得意，所以就玩即興，拉我一齊去試，結果我地兩人各有各驚喜 ！夜間為酒吧o既Xperience位於名酒家「美利堅」對面，離金鐘地鐡站不遠，附近有多間酒店，每晚更以不同舞蹈作主題吸引各式舞王舞后，閒日夜晚路過都留意到酒吧不乏蒲客，只係從來都冇諗到酒吧日間會提供越南餸菜，聽到時真係嚇咗一跳 ！Xperience係地舖，有一半座位設於室外，有大樹遮蔭，天氣如果唔係好熱應該都幾涼爽，當然亦係煙民最受歡迎o既位置啦！吧枱前有六、七張散座，由於分隔得都幾開，所以雖然中門大開，冷氣唔係好夠勁（環境分被扣之主要原因！ ），感覺上都算通爽闊落；吧枱後面，即近廚房門，仲有幾枱隱蔽o既梳化位，食客可以一邊玩飛標，一邊食野，唔怪得知夜晚咁爆場啦，原來有咁多玩意。酒吧餐廳o既服務生大多以英語溝通，不過當中都有人識講廣東話，不過最搞鬼就係經理哥哥，不但吹得兩嘴，佢啲廣東話更逗得我honey哈哈大笑，成功贏取美人芳心及「靚仔經理」之封號
夜間為酒吧o既Xperience位於名酒家「美利堅」對面，離金鐘地鐡站不遠，附近有多間酒店，每晚更以不同舞蹈作主題吸引各式舞王舞后，閒日夜晚路過都留意到酒吧不乏蒲客，只係從來都冇諗到酒吧日間會提供越南餸菜，聽到時真係嚇咗一跳 ！Xperience係地舖，有一半座位設於室外，有大樹遮蔭，天氣如果唔係好熱應該都幾涼爽，當然亦係煙民最受歡迎o既位置啦！吧枱前有六、七張散座，由於分隔得都幾開，所以雖然中門大開，冷氣唔係好夠勁（環境分被扣之主要原因！ ），感覺上都算通爽闊落；吧枱後面，即近廚房門，仲有幾枱隱蔽o既梳化位，食客可以一邊玩飛標，一邊食野，唔怪得知夜晚咁爆場啦，原來有咁多玩意。酒吧餐廳o既服務生大多以英語溝通，不過當中都有人識講廣東話，不過最搞鬼就係經理哥哥，不但吹得兩嘴，佢啲廣東話更逗得我honey哈哈大笑，成功贏取美人芳心及「靚仔經理」之封號 ！靚仔經理不但落力，毫無架子，而且衛生意識高，就算傳菜換碟等功夫亦親力親為，極為難得。閒談中得知靚仔經理來自越南，酒吧都係兩個幾月前先開始提供越式午餐，食物菜式全以其家鄉之秘方所烹調而成 ，可以話係正中過正中！佢地而家所推出緊o既越式午巿套餐尚在試驗階段，想先睇吓顧客o既反應及熱烈程度，然後再因應需求進行調整。
Royal Spring Roll越式春卷：靚仔經理非常細心，呈上越式春卷時千叮萬囑我地要以生菜包住黎食，同小心睇熱 ！春卷內之肉餡幼嫩，生菜鮮綠爽脆，包住熱辣辣o既春卷食，口感非常鬆化，點上酸酸甜甜o既橙色秘汁更覺清新醒神 ！
Saigon Green Papaya Salad 乾牛肉絲青木瓜沙律：Honey最愛食菜，頭盤唔洗諗一定叫沙律：「切成幼絲o既青木瓜同青瓜又爽又脆，味道帶少少辣，估計係由煙煙韌韌o既牛肉絲散發出黎，好醒胃。如果要同方間o既越南菜館比，個人覺得有過之而無不及呀 ！」
Grilled Lemongrass Pork with Vietnamese Cold Vermicelli香芧豬柳撈檬：雖然碗面舖滿鮮菜，但原來個碗好深，菜底有多件香芧豬柳，檬粉o既份量仲多到有少少驚人添 。靚仔經理話食檬一定要撈勻，千奇唔好手軟，要加多啲秘汁先會好味 ！以秘汁撈製o既檬粉軟身彈牙、毫不油膩，細細條o既香芧豬柳燒得好夠脆皮香口，而且一啲都唔乾，整體清脆利落。
Vietnamese Raw Beef Rice Noodle Soup生牛肉湯河：據靚仔經理所講，湯底以牛骨長時間淆製，保證味道濃郁，事實亦非常香濃美味。此外，湯中o既河粉好夠軟滑，洋葱更加係鮮甜清爽！最值得讚許o既係酒吧絕不吝嗇，湯河中之主角牛肉薄片全為美國牛 ，軟熟得黎好有牛肉味，我地二人都like爆 ！
Iced Coffee涷咖啡：小肥飲咖啡味道一定要夠濃，Xperience杯涷咖啡滑就夠香滑，亦好夠涷，不過個人覺得咖啡濃度如果可以double就更加好 。
Xperience地方開揚，設有室外座位，喺度用膳感覺都幾輕鬆他條，唯獨個人覺得空調不足，希望酒吧可以稍作調節，或關閉落地玻璃門窗，免得冷氣外流出街。夜間為酒吧o既Xperience，現正推廣週日越式午巿套餐，真係好有驚喜！廚房選用o既食材高質、份量足，湯底淆得夠火候，越菜中不可缺少o既秘汁又香甜野味，不但奉送飲品，而且無加一服務費，埋單每人一百蚊有找，仲要飽到攬住個肚，絕對超值 ！最感動就係有位靚仔經理坐鎮，除咗勤奮落力、體貼好客，佢亦非常幽默友善，服務真係好到加零一 ！香港人食飯都鍾意人多，可以試多幾道菜式，食越南菜都一樣，就算兩個人去食都會情願叫幾款小食，最後先叫碗河粉黎分。雖然酒吧並無強迫每位食客要叫一客套餐，不過如果想試多幾味，就要叫多幾set，即食多幾客澱粉質主菜，所以在此，小弟想建議Xperience加推單點餐牌（À la carte menu）以供食客選擇。
Post
