小王牛肉麵 (Closed)

早前在另一間分店食過啲超淋嘅牛筋，雖然係入口即溶，但毫無咬口，令我非常失望。今日經過奧海城，心思思想再試一次，希望可以令我重拾信心。奧運站分店雖然面積不很大，但可能食客不多，都有足夠空間感，坐得頗舒服嘅。今次唔敢淨食牛筋麵喇，改食半筋半肉粗麵和珍珠奶茶。湯底好濃郁，有少少藥材味，粗麵有咬口，煮得不太淋，唔錯！主角牛筋雖然有部分好淋，但有部份都唔錯嘅，有得咬吓。要讚嘅係牛肉好入味，又唔靱，今次呢碗麵食得比較滿意。珍珠奶茶茶味可以，不過珍珠就實在太少喇！少到要飲管追蹤至飲得到。其實唔好話我醃尖，60蚊食一碗麵，都應該可以有啲要求啩！