金牌小龍 (Closed)

咁多菜式中，台灣菜應該係最便宜，今次去左金牌小龍，主打上海同台灣菜。雖然金牌小龍位於ISQUARE，但價格相當大眾。餐廳係L字型，傢私以木為主調，枱之間既空間非常足夠。另外每一枱上面都有一盞細吊燈，所以光線非常充足。見到下單紙就知道食物種類繁多，淨係小籠包都有七款。最先上菜係萵筍絲。一開始落單前冇睇餐牌相片，以為係熱食。涷食既萵筍幾爽脆，味道酸酸甜甜。鮮蝦紅油炒手辣勁十足，皮薄之外餡料係鮮蝦所以好爽口，口感亦豐富。本人高度推介牛肉餡餅！牛肉鮮嫩多汁，一咬就爆汁，外皮酥脆而且唔厚既然係上海菜，小籠包當然非叫不可。今次叫左蟹黃小籠包，一籠總共有5粒，拿起時不易破爛，皮薄但仍然煙韌。餡料亦不錯，不過蟹黃味唔係太出。一品獅子頭一碟有兩個，肉質軟腍度不錯。最後係蟹黃麵。今次湯底蟹黃味突出，湯底亦有蟹肉同蝦，令人垂涎三尺。另外麵條份量多，掛湯能力高，所以一食麵條就嘗到蟹黃味，最後連湯都唔放過飲曬。除咗蟹黃麵比較貴之外，其他菜式都係平民級價錢，味道卻超越平民級。喺尖沙咀嘅商場搵到一間性價比高嘅餐廳實在難能可貴。