花木日本料理 (Closed)

為左補祝母親節，知道媽咪不嬲最中意就係食日本菜，所以今晚特登搵左一間高級日本餐廳慰勞一下佢，另外當係吊下佢個日本癮先，因為佢成日都叫我帶佢去日本食好野😅，等我得閒我一定會做孝子帶佢去既。餐廳裝修真係好靚，好有銀座區既高級日本菜既感覺，環境真係攞滿分，我見佢仲有房間可以提供，一大班人黎食一定好熱鬧好開心。食物方面絕對襯得起佢個裝修，因為我覺得真係全部都勁高質。首先係鮟鱇魚肝作為前菜，好滑好入味，食完好開胃。跟住係花木卷，即係餐廳自創既卷物，用左炸洋蔥絲配撘吞拿魚蓉，炸洋蔥絲勁香口惹味，吞拿魚蓉充滿油脂既香口感覺，無論賣相同味道都一流。跟住係花木激安刺身盛，我覺得呢個好抵食，因為加埋有十款時令既刺身，好啱媽咪呢d想食刺身又唔知點叫既人，碟刺身淨係望都勁吸引，食落更加係無得頂，每種刺身都勁新鮮，媽咪食得勁開心。跟住叫幾款壽司，分別係帆立貝，赤貝，深海池魚，左口魚邊同埋鰻魚。帆立貝勁大粒又勁肥美，赤貝好新鮮好爽甜，深海池魚口感一流，左口魚邊油脂味香濃，鰻魚壽司條鰻魚差唔多有手臂咁長，肉夠厚又夠肥美，好正。最後叫左個燒羊架，個燒羊架好有驚喜，燒得好香，肉質豐富，食到媽咪都話好滋味！