Giacomo Ristorante (Closed)

疫情下成日同朋友去staycation，今次去銅鑼灣皇冠假日酒店，中午搵食時就見到呢間Giacomo意大利餐廳。餐廳環境好靚～用灰藍色做主調，樓底好高，而且枱同枱之間都好有空間坐得好舒服。窗邊仲係用咗落地玻璃，好光猛。我哋本身都好少會叫咁優雅嘅食物，但嚟到呢間餐廳就一於試一試慢活吓～Cheese Selection：是意大利芝士同法國芝士。旁邊嘅多士好特別原來係用紅酒做出嚟嘅Toast，旁邊仲有少少橘子果醬同埋提子乾配襯。平時食呢啲芝士拼盤只有芝士嘅鹹味，餐廳俾埋少少果醬就覺得可以有唔同食法，冇咁悶。Red Prawn Spaghetti Chitarra：見到賣相嗰陣都有啲驚訝，因為隻蝦好大隻，食落好新鮮，啖啖肉。意粉掛住好多醬汁，吸晒啲味。而且軟硬度適中，都算唔錯。但如果份量多返少少可能會好啲，有啲細碟咗。Mayura Beef Tenderlion：牛里脊約煮至7成熟，食落好淋身，無咩筋。牛味算好香濃，而且伴碟嘅蘑菇都吸收到好多牛肉汁。點埋下面鋪底嘅青醬汁，感覺無咁膩。