昼月

Open Now

Now Closed

今日lunch去開銅鑼灣搵朋友，見到呢間新開嘅日式餐廳，見佢裝修幾靚、便當造型幾别緻就去試下。朋友睇相揀咗昼月雞肉玉子丼，上菜嘅時候果然無令人失望，好似相入面咁特別。最底一層玉子，中間一層手打免治雞肉漢堡，最頂自行加上新鮮蛋黃再淋醬油，撈埋一齊食，可以食到雞肉同雞蛋唔同嘅口感同味道。雞肉漢堡係餐廳自家製，鮮嫩嘅雞肉夾雜住軟骨，好有咬口。蛋汁好香，撈飯食非常適合。我揀咗昼月特選刺身丼，餐廳非常慷慨，用料亦非常新鮮，刺身丼鋪滿肥美嘅三文魚、香薰撲鼻嘅吞拿魚魚蓉、厚身嘅油甘魚、好好肉地嘅魴鮄魚、同大大隻嘅赤蝦。人生第一次食魴鮄魚，但據職員所講，時令刺身幾乎日日都唔同，因為餐廳一星期四次由日本即送刺身。隨餐附送麵豉湯。仲有漬物做前菜。追加咗吉列生蠔，又脆又多汁。餐廳有serve 唔同嘅樽裝茶，各有特色。我揀咗雪糕氣泡焙茶，氣泡茶茶味濃郁，亦好神奇做到雪糕味。熱情果綠茶，味道相對清新，略帶酸甜，食完炸嘢好啱飲。