Cow Bean (荃灣廣場) (Closed)

先前成日都去呢間餐廳食晚飯，佢有好多唔同類型嘅西餐食物可以選擇，但係最近唔知係咪因為天氣凍左，所以將全部餐變成做鐵板餐，今日一入荃灣廣場，就已經聞到好大浸香味！令人食指大動，好想衝入去食啊。餐廳大排長龍，到食飯時間餐廳裏面並無虛席，整間餐廳香氣洋溢，感覺有點像牛扒快餐店。睇到餐牌真係令人垂涎三尺，上面有唔同類型嘅牛扒，包括食客經常點嘅西冷同肉眼扒，而且仲嚟自唔同國家，分別有澳洲、紐西蘭同美國，經過店員嘅推介，我哋決定叫咗去美國肉眼扒，大概15分鐘就送到去我嘅面前，我揀咗黑椒汁，黑椒香氣非常濃烈，而且鐵板燒都好夠熱，到啲汁落去鐵板嘅時候粟米更加熱至彈起！熱氣騰騰，霹靂啪喇，真係好誇張。肉眼扒上面擺咗一舊牛油，使肉質更滑嫩，切落去嘅時候，裏面只有四成熟，要經過鐵板再烹調才會更熟。牛扒夠厚，而且好夠牛肉味，咬口不錯，肉邊比較多脂肪，香氣四溢，大啖大啖咀嚼，令人大快朵頤。我哋今餐+$29仲會加埋罐裝柚子蜜、沙律同意粉，經濟又實惠，沙律加少少酸甜汁令人份外開胃，而且沙律菜夠新鮮，用樽裝盛載，透明易見，帶點小清新感覺。冬天一定要再嚟食啦！