鐵牛台灣牛肉麵 (希爾頓大廈)

Open Now

Now Closed

約朋友食飯要選中間點多數都係尖沙咀，如果想食平D當然係去尖東啦，今次朋友約去食鐵牛台灣牛肉麵，行左一陣先發現原來餐廳係位於地庫，餐廳環境都好新淨企理，落單方法係先係order紙選好野食，再出收銀處付款後，就可以坐低等職員送餐。招牌紅燒牛肉麵 - 麵質同湯底都可以接受， 麵雖偏軟身但都爽口，湯味道都有濃郁牛肉味，至於牛肉比較大舊，味道都唔錯，值得一試。鮮蕃茄大塊牛肉麵 - 蕃茄湯底有咩特別，只係多左D蕃茄，牛肉個樣同紅燒牛肉冇分別，但朋友話牛肉韌到咬唔開，最後放棄左冇食晒D牛肉。紅燒牛腩配黃金地瓜飯 - 紅燒牛腩其實唔錯，可惜飯的味道一般，最主要係地瓜唔香。鹽酥小拼盤(逢甲鹽酥雞、黃金梅子脆薯和酥炸花枝丸) - 分量有點尷尬，雖然鹽酥雞分量唔算少，但花枝丸得兩粒，梅子脆薯又有三舊，其實都比較難分，不過可能咁擺法好睇D啦。味道則鹽酥雞最普通，比較多炸粉；花枝丸好少少，味道正常；梅子脆薯相比下味道最好，配上梅子粉酸酸甜甜夠開胃。整體而言，食物質素都唔錯，價錢同分量都合理，同朋友來食都係好選擇。