Pici

Open Now

Now Closed

識Pici一定係叫佢嘅Testing Menu最抵食，包括餐包，兩個前菜，三個意粉，同埋兩個甜品。前菜叫咗肉丸同埋吞拿魚他他，肉丸好夠熱辣辣，而且質感好好，會食到啲肉粒，他他都好新鮮，可以試吓加埋麵包一齊食。肉醬千層麵稍嫌有啲油膩，一切落去就浮左成層油起身，但係好夠熱，芝士拉到絲，而且肉醬都好多。我哋加錢叫咗個pasta of the day，係蜆肉意粉，成個意粉偏鹹，唔係好有海鮮嘅鮮味，可以唔使加錢叫。貓耳意粉好好食，唔係度度都有得食，口感好煙韌，嗰張係偏向番茄奶油味，最鍾意呢一個意粉，但係相比其他佢唔算好濃味。甜品就每樣都叫咗一個，一個係果醬牛奶布丁，另外一個係招牌Tiramisu。牛奶布丁上面嘅果醬，對我來講有少少太甜，但係質感幾好，可以食到少少果肉，牛奶布丁好重奶味，好滑。Tiramisu就幾時都咁好食，佢嘅咖啡味剛剛好唔會太苦，但係成個蛋糕都唔會太甜，下次會叫返兩個Tiramisu。