鮮芋仙 (V Point )

Open Now

Now Closed

想食呢間台灣過江龍好耐，食完新年飯唔飽就黎食第二餐。9點黎到，都已經坐滿，好彩等陣幾分鐘，就有位。呢點就唔係好適合大家慢慢食談心。由於係新春，所以選擇比平時少，冇咗咩芋圓123號，亦都冇豆花。我地一家三口就叫咗兩款，分別係招牌仙草沙冰同埋熱芋圓紫米粥。兩碗都係大碗，share食剛剛好。招牌仙草沙冰幾有驚喜，因為本身唔好仙草。沙冰唔會淡而冇味，有仙草嘅甜味。其中一個原因本身唔好仙草係因為有時出面食會好硬同埋有一種唔識形容嘅健康甘甘地嘅味道，但今次冇呢個問題，同埋夠曬滑。芋圓有兩隻色，一個相信係芋圓，另一個相信係番薯，因為黃色嘅。但我因爲有d狼吞虎嚥，所以冇仔細食佢地有冇咩大分別。不過可以講句，芋圓係有Q彈口感，呢點係精髓。熱芋圓紫米粥嘅芋圓同招牌仙草沙冰一樣，但可能因為熱食嘅原因，芋圓冇咁Q彈。而紫米粥亦遜色。一係唔夠熱，對於母親大人黎講，最唔鐘意就係唔熱唔凍、兩頭唔到岸嘅食物。二係唔夠甜。三係太水，紫米唔多。雖然今次唔係話太驚歎，但會有下次。等過咗新春，有多d款式再黎食。