森美餐廳 (Moved) New Location

近日因事經常要出街食飯，但食來食去已經唔知仲有咩野新意，最後上 OpenRice 搵料，機緣巧合下來到森美餐廳。因為見資料寫住座位唔多，所以搭車途中打電話 book 位，接電話的女士好有禮貌，仲特別提醒我地去華都中心二樓，唔係網頁寫住的地下舖位。（好彩，否則可能摸門釘）我叫了鮮茄焗龍利柳飯，上檯時好香，因為面頭鋪了好多芝士。食落一Ｄ都唔「漏」，而且蕃茄新鮮，唔係平時焗到得番少少肉連住Ｄ皮那種。我加 15蚊改餐，再加 15蚊轉龍蝦海鮮湯。無諗過個湯會有忌廉拉花，好靚。可惜太肚餓，唔記得影相就飲完。阿媽就叫左蟹籽鮮蝦炒飯。每羹飯都有好多蟹籽，望落成碟都係橙橙地色，不過味道稍嫌鹹了一些，但不是要狂飲水那種。佢都加 15蚊轉套餐，選了雜菜湯，味道尚可。另一半要了套餐，羊架配意粉，有湯有甜品。阿媽讚羊架很嫩滑，我食了少少，都覺得好好味，水準拍得住酒店餐廳。甜品選了芝士軟餅，芝士味濃郁，就算單叫都只係 18蚊，好抵食。我同阿媽就額外叫了朱古力心太軟，亦都唔錯。臨走時老闆娘親自拉開座椅，而且笑容親切，為餐廳再加分。