阿木台灣麵 (豉油街)

Open Now

Now Closed

旺角呢間台灣餐廳中午同夜晚時段，長期都好多人排隊，難得老公放假陪我旺角行街，當然要試吓呢間好出名嘅阿木台灣麵，今次我地避開咗午餐時段，大約4點幾嚟食，唔洗排隊就可以入座。今次叫咗個紅燒牛肉麵，湯底好濃郁好有鮮味唔會煮到好鹹，牛肉份量好多，而且好大塊同好厚，牛肉帶有筋嘅部份，食落一啲都唔硬仲好冧，口感好豐富，麵好煙韌食落好有咬口，值得一試。芝士肉鬆蛋餅，煎到金黃色外脆內軟，裏面啲肉鬆好足料多到掉出嚟，夾埋芝士一齊食好濃郁，鹹鹹地甜甜地食落好滋味。梅子地瓜條，啱啱炸起嘅地瓜條食落脆卜卜，地瓜條份量好多，而梅子粉唔會太酸，食落甜甜地帶輕微嘅酸味，連埋地瓜條一齊食好開胃。