唐人坊 (Closed)

Item: Tong Yan Fong
Rating: 2
Author: 奧志雷

Tong Yan Fong

3.5

56 Reviews

Taste

Decor

Service

Hygiene

Value

1529

Hung Hom

Below $50

Hong Kong Style Thai Tea Restaurant

奧志雷

Level4

2.1K

Read full review

有美少女茉莉花相伴共餐特別醒神開心，泰亞萊居然已執笠，唯有轉戰唐人坊。點解張單印住金冠，已轉左手？轉眼幾年無幫襯，不知質素變成如何。平時都沒有那麼旺場，落雨反而食客一浪接一浪。地盤、電工、裝修、西裝、OL、師拉、阿叔、美少女、學生、等等，應有盡有。

熱齋啡，雖然水溫過高會使到咖啡變酸，但依個溫度微暖，咖啡香味出不到來的，薄薄水水的味道。樽仔無冰奶茶，甜甜奶味，弱弱茶味，幼滑不足。青檸梳打，室溫梳打水，何解不雪呢？要等冰稍為溶化才夠凍，甜味強帶少少酸，第 1 杯還夠凍，第 2 杯已沒有冰了。

海南雞拼豬頸肉飯，雞髀肉勁結實而嫩滑，雞味濃帶鳳脂甘甜，連雞翼都去埋骨有誠意。豬頸肉硬掘掘，少點牙力都處理唔到，味道焦香，搭上濕爛黃薑飯還可以。

海南雞飯，黃薑飯濕濕的，幸好香香的甜甜的可接受的。有骨無骨各有好處，有骨原汁原味更多雞汁雞油雞香味，無骨食得方便啖啖肉吸汁力更強勁。結實質地三黃雞，雞味清甜濃郁，雞皮彈滑不油膩。醬汁在海南雞飯裡永遠擔當重要角色，酸汁不辣而開胃，讓雞肉打滾一下，索盡酸汁再躺在香香雞油黃薑飯上，狠狠地全部塞入口，相互擦出愛火花，比起無汁更可口更好味。

頭抽瑞士無骨雞飯，外觀企理骨子靚靚仔仔，師傅有誠意。蔥油用鹽熟成不足或是熟油不夠滾，沒有加雞汁調味，草腥味強烈野蠻，油膩感爆燈，吃不下！什麼瑞士雞呢，隻雞來自瑞士？跟本就係普通豉油雞，完全不是瑞士汁來的。豉油味清淡配上黑糖豉油更好味道，隻雞是否每日勤做健身啊？肉質過份結實，微彈超韌的，趙到我牙骹軟，給多一點時間嘴嚼吧！髀肉都還有一絲鮮味，胸肉有點驚嚇的隔夜異味，幸好都還入到口。油味飯完全失敗唔想食，但我實在太肚餓，頂硬上食掉大半碟，陰功豬。質地濕爛，黏黏一舊舊，第一啖我而縐眉扁晒嘴，凍凍的連微暖也沒有，散發少許倒汗水味，單調淡茂茂的黃薑味，食不到有雞油甘香味，撈得不均勻，迷彩一撻撻。

孖寶雞飯，頭抽瑞士無骨雞併海南雞配油味飯，海南雞開檔十多年水準依然，結實彈牙滑嘟嘟，雞甜味非凡彷似有著鮮果清香，皮薄嫩嫩鳳脂豐富甘甜，還藏著滴滴啫喱狀骨膠原，食得開心愉快，當堂靚晒！泰汁附著泰國的靈魂，風味十足，強酸微辣散發強烈香料芬芳，助味一絕使到雞肉味道提升好幾倍，格外開胃醒神食唔停口，就算油味飯濕濕爛爛黏埋一舊舊，都忍不住都要配飯大口大口地吞噬。當雞件完全消滅便可以停下來咯，剩下大半碟飯慘不忍睹，會否轉白飯會比較好呢？

金牌鹽焗雞飯，好壞參半的雞件，有幾舊散發隔夜異味。雞皮滑嘟嘟，肉質依舊非常結實有嚼勁，不乾鞋亦不乏肉汁，做食物傳心員要有冒險精神及必死既決心。白飯與油味飯同樣濕爛黏口，我唔食軟飯架﹗免強應酬幾啖吧，少少飯多多肉塞入嘴仔。蔥油貫徹終始由頭腥到尾，大大粒蔥花油淋淋不香甜不惹味。沙薑醬香香咸咸正常得多，還可以掩蓋部份隔夜嗅雞異味呢。

泰式咸菜豬手飯，未食只看外觀，第七感話我知有需要撈泰式酸汁享用。食過多間海南雞飯，從來未試過要碟泰式酸汁竟要額外加收 $3 蚊！好好好無所謂，大媽您幫我即刻即刻即刻入去攞！豬手十足十罐頭紅燒肉，鞋鞋硬硬咸味重，滾上酸辣汁可以略為減輕少少。白飯依舊濕爛，有酸辣汁助陣，搭舊乾硬豬肉免強下嚥。

四寶飯，無骨海南雞穩陣招牌菜夠結實硬淨，豬頸肉可能比海南雞更出色，佳品豬甜味出眾，半肥瘦夠爽彈夠多汁水潤不肥膩，燒得香口十分誘惑。蝦餅死實的質地沉悶的，味道半點蝦鮮味也沒有。魚餅竟然比蝦餅好少少，雖然油淋淋難得還有一絲檸檬葉的清香夾少許魚肉味添。貫徹始終濕爛飯粒，一舊舊黐到實真的好難處理，食幾啖算好比面喇。

無骨雞腳，酸味濃烈，辣味微弱到感覺不到，爽脆冰凍蠻不錯。大大舊洋蔥沒什麼作用，加芹菜多點車厘茄會更清新。涼伴土豆絲，比無骨酸辣鳳爪更酸，辣味微弱得感受不到，夠冰凍夠爽脆，免強過關。

豬扒冬蔭功湯米線，香茅豬扒來的，微暖油淋淋，用湯洗洗舒服多了，鬆化有點過咸。會否太求其那西呢？米線滾都無滾過就隊出黎！湯微暖、米線凍，離晒譜！未試過湯米線都可以玩冰火，爽滑不嚥韌，跟酸酸冬蔭功湯馬虎掃晒入口算數。

麻辣海蜇手撕雞飯，何解撈埋粗粗生菜絲呢？全部剔除。諗住撈上大量勁咸汁我就食唔出？依種諗法實在太天真喇！強烈隔夜嗅雞味完全未能被咸味掩蓋，粒粒硬實雞碎，咸咸濕濕不麻不辣，什麼醬來的？成碗都係飯焦，咁都出比客，有無搞錯呀，您估煲仔飯咩？乾乾硬硬黐牙可惡！

泰式雜錦湯金邊粉，豬頸肉真係堅得食得下架喎，熾熱爽彈味濃，肉汁滴滴，油脂甘香，證實比海南雞更美味更優質！如果苦澀椰菜換上爽甜紹菜就更鮮甜。坑紋札肉條軟拉拉淡茂茂，雞絲真係絲黎喎，不是早前嘆過的硬實隔夜異味雞粒，結實帶彈每口充滿雞甜味道。金邊粉米香霸道，長長完整不碎不短，大啖大啖啜得興奮莫明。熱騰騰燙燙嘴是最美味的溫度，湯底醇厚味甜不用再調味，捲起紫菜，捲起雞絲，跟金邊粉齊齊食，各具風格同樣讚不絕口。

咖哩薯仔無骨雞飯，只不過係平時的海南雞飯跟個咖哩汁，倒不如海南雞飯下面寫住可以揀咖哩、黑椒、蒜蓉、茄汁啦。雞件依舊硬實爽爽，白飯依舊濕腍爛。微溫咖哩汁何解不開火滾滾去？就算用微波爐叮叮翻熱都好啦！撈入生洋蔥、生青紅椒跟本無用，何解不加入雞件猛火兜炒一下，只係花幾秒時間就可使色香味出晒黎！咖哩汁就算慳住食，都只能極限送到半碟飯。