火鳳凰火鍋料理 (Closed)

呢幾日天氣都仲係有啲凍，最合適就係打邊爐。旺角搵食一向都係最佳選擇。餐廳位處於何文田地段，算係比較寧靜，係旺角東站行過去10分鐘就到。湯底我地點咗一客「鮮椰子紅棗滋補清遠雞鍋(半隻）」。椰子湯底好清甜，配料好足，建議係湯底滾咗之後，飲返一兩碗補下身，先至開始落料打邊爐。雞件分開上，肉質非常鮮嫩，半份係兩個人嘅分量。餐廳主打牛套餐，一個價錢食到幾款嘅選擇，最岩選擇困難症嘅我地。我地揀咗「套餐E」，有「美國封門柳」、「安格斯牛肩胛」、「高級牛板腱」。隻牛真係嚇一跳，驚喜十足！未食已經夠晒驚喜！一定要打卡影相！餐廳職員仲好有心思咁介紹邊一種牛特別有牛味，邊一種牛特別嫩口，由邊種牛食起最享受，真係好專業！「手工炸跳舞響鈴」係師傅即炸嘅，唔係講笑，上碟時仲熱辣辣，非常脆口，新鮮即製永遠最好食，浸一浸湯底三秒鐘拎上黎就食得。「手工黑松露墨魚丸」、「手打四寶丸」師傅好有心機，手工打造墨魚丸，粒粒爽口彈牙有咬口，最得我歡心！「稻庭烏冬」非常嫩滑，打邊爐就最入味！餐廳性價比十分高，又坐得舒服，下次會再來！