榕樹頭

Open Now

Now Closed

今晚放工入嚟夜遊大嶼山銀礦灣，行到9點幾，餓餓地，係時候搵啲宵夜食下，平日晚上的銀礦灣好寧靜，食肆都唔多人，隨便揀一間食都ok，但一支公獨遊覓食，夜晚9點幾10點，無理由去海邊整返個蒜蓉蒸蟶子王掛？所以就誤打誤撞見到這間喺openrice都未有食評嘅麵檔，正，一於等我開齋。入到去，望一望牆上的餐牌，其實泥鯭粥都好吸引，但天氣真係有啲熱，食粥真係熱上加熱，所以㨂左最普通的雲吞麵，一嚟到，見到放葱而唔係韮黃，不其然有啲失望，但抱住「梗係加入香港口味」的心態一試，竟然喜出望外，一咬粒雲吞，爽喎，雲吞裡面，9成係蝦，仲要係新鮮蝦，成粒雲吞都係，當然啦，如果你鍾意食豬肉饀多啲嘅，呢粒雲吞就唔啱你。仲有麵夠爽，湯夠清，而個人夠味，鍾意雲吞麵加胡椒粉，一落，係辣嘅胡椒粉，一流，唔似加左好多沾米粉嘅「扮胡椒粉」，啱我，雲吞麵配辣胡椒粉，滿足。食好麵，同老闆傾左陣計，佢話蝦同豬肉都係日日新鮮從街巿買的，這就係小店的威力。其他客人提議我食白灼豬什和炸鯪魚，一諗起，差啲要心動，不過今天一支公，點食到咁多嘢呢？唯有忍忍口，下次帶多幾個朋人嚟試啦！食飽，繼續漫遊銀礦灣。