R.I.M.K (Closed)

嚟到旺角想去一啲新嘅餐廳， 見到呢間餐廳 評論都唔錯， 喺豉油街以為好易搵到， 點知原來昌記大廈樓下冇門牌， 又有兩邊樓梯上去， 豉油街嗰邊係後樓梯， 好在都唔算太污糟。 入到餐廳完全兩個世界， 有一邊大窗可以睇到西洋菜街， 整體都算光猛開揚， 裝修亦雅致，有個特色牆可以打卡之用。 蒜蓉牛油煮蜆$88，份量都算充足， 個蒜蓉牛油汁好香， 蜆肉亦好鮮甜新鮮。 脆炸黑松露雞翼， 有少少似韓式炸雞翼，外脆內嫩， 感覺唔會太油膩， 加埋沙律醬一齊食都幾邪惡。 西西里大蝦辣蕃茄意大利粉$128， 加多40蚊可以轉為套餐， 有成六隻大蝦， 每一隻都算大隻， 蝦肉鮮甜結實。 套餐甜品係檸檬芝士蛋糕，水準合格。 另外叫咗一個雪糕格仔餅$38， 有兩個雪糕再加埋格仔餅， 性價比高。