東煲西炒 (Closed)

今日心血來潮想食雞煲，即刻打比朋友約埋一齊飯，基本上雞煲加火鍋一定無衰啦！行過見到個招牌名幾得意，加上$168雞煲加任食火鍋一位又唔貴，二話不說就上去試試，坐左唔夠五分鐘就上左4件點心，皮太厚餡又無味道，心諗送末必好嘢，主角雞煲終於出場，好好地一個雞煲加酒放火有咩嘢用呢？個雞煲味道巳經唔掂檔加埋酒苦味走哂出來，先講反個煲，味道好普通只有個鹹味同勁多味精，雞就全部都係雪味，食左一兩啖巳經唔想再繼續食，打邊爐再基本肥牛同丸類包無衰，然後我叫左樓面加湯準備打邊爐，湯滾起當然第一件事就係食肥牛，另一番中伏又開始，肥牛有一個五蚊咁厚，剛好有個睇落好似經理路過，我就問牛肉咁厚點食可唔可以換過一份比我，對方好有禮貌同我講，唔好意思公司所有肥牛都係一樣，我無辦法之後只好接受就當牛肉味香口膠，我同我朋友食到四份一巳經叫埋單，然後去食碗雲呑麵。