Fûhn (The L. Square) (Closed)

想食呢間好耐，8點鐘去到坐無虛席，我諗想食都係book定位好啲。望望個餐牌，好似同Openrice見到嘅唔同咗，唔知係咪最近轉咗，但點都好，都係食越南野為主嘅。我地兩個人叫咗一碗雞絲配春雞脾湯檬，同埋一個超正嘅小食拼盤。野飲就叫咗杯荔枝椰果梳打同白桃沙冰。呢度嘅湯檬比其他餐廳貴，但貴得好有價值。首先佢大大碗，一碗雞絲湯檬，除咗雞絲，仲有雞軟骨丸，同一隻細細嘅春雞脾。一上枱，極香雞湯味，但望落去又唔會有好多雞油浮面嗰種油膩感。食落去雞絲非常嫩滑，檬粉配上雞湯亦雞味濃郁，但唔會太咸，恰到好處。加埋佢落咗好多蔥花碎，成件事好夾，啲蔥花都要讚一讚，因為係食得出係新鮮嘅蔥嚟。另外，佢芽菜香茅葉青檸嗰啲調味係另上嘅，咁就可以按自己口味落～而小食拼盤就熱氣少少嘅，但飲返杯沙冰唔怕啦。拼盤有炸豆腐、炸蝦餅、炸雞翼、軟殼蟹、炸春卷等等，每款兩件。炸蝦餅最出色，入面真係有大大隻蝦架，唔係淨係蝦膠，所以啲蝦味特別出。其他都炸得好有水準，唔係太油，調味上亦唔會太重口味，所以食完咁多款都唔會好滯野飲就正正常常啦，鍾意佢唔會過甜，無當糖漿唔使錢係咁落haha