Artisan Lounge by LUBUDS

Open Now

Now Closed

週日同太太去附近名店購物之後，店員介紹我到呢間見過好多次，但冇入過去嘅餐廳試吓。名店店員大力推介焗豬扒飯，我太太一向都好鍾意食焗豬扒飯。我就預咗佢食唔晒，所以我唔敢叫太大份嘅嘢，結果叫咗個手工 bolognese 和牛闊條麵，預咗要幫老婆執手尾。結果兩樣都有驚喜：好多年冇食過好食嘅肉醬，之前喺The One 食過一間好食嘅，但係可惜已經執咗。我仲以為要去返意大利先食得返。至於老婆個焗豬扒飯，結果真係食唔晒，我食完個闊條麵居然都仲可以幫佢掃埋；最重要係，其實我不嬲都唔鍾意食焗豬扒飯，因為又鞋又乾，呢間餐廳個廚師，唔知佢用咗啲乜嘢魔法，可以令到塊豬扒外脆但裏面軟熟，唔肥，又好有豬味，死就死返到屋企預咗要返去跑步燒返食多咗嘅。每人加多一杯Cocktail，都係七百幾蚊落樓，七百幾蚊可能一般舖頭嚟講係貴，但係食肆價錢我覺得係可以同食物質素掛勾嘅，呢間餐廳嘅食物絕對對得起呢個價錢。遲啲一定要再嚟過幫襯支持下