凱柏冰室 (Closed)

呢個星期第二次喺海之戀商場食晚飯，今次揀咗位於商場地下嘅呢間冰室，位置比較隱蔽，門口唔喺商場入面，而係喺海濱直接入嚟。食物選擇唔算多，晚市主打茶餐、小菜、鐵板餐同喇沙湯粉，價錢非常合理。一向對喇沙毫無抵抗力嘅我一眼就睇中呢個喇沙湯銀絲米粉，皆因佢標榜係正宗嘅新加坡椰香喇沙，一試湯頭果然有料到，味道係極度香濃，配上細軟嘅銀絲米粉同爽脆嘅芽菜絕對一流，淨食湯粉已經令人滿足。魚片同平時食到嘅唔同，用腐皮包住再炸，口感彈牙。雞翼帶有淡淡嘅香茅味，炸得非常酥脆，但又唔會乾爭爭，配上喇沙湯底亦係一流。鐵板餐配搭選擇多，豬扒仲可以揀香茅豬扒或者吉列豬扒，當然唔可以放過咁少有嘅吉列豬扒，配上香烤雞扒，大大份。鐵板餐本身附送腸仔、火腿、粟米同薯條，份量好足，腸仔更加係廚師腸，加分！吉列豬扒炸得夠香脆，炸漿亦唔厚，配上黑椒汁份外惹味。香烤雞扒非常厚，而且肉嫩多汁，質素同樣唔錯。熱檸蜜香甜滋潤，最適合而家初秋嘅天氣。凍檸茶大大杯，茶味香濃，甜度適中，係鐵板餐嘅最佳拍檔。冰室整體食物質素唔錯，特別係喇沙湯粉，香濃滋味實在令人留低深刻嘅印象，原來常餐都可以配搭喇沙湯底，下次一定唔可以錯過。