王牌冰室 (九龍貿易中心) (Closed)

在附近工作，當然一定留意新野，門面好吸引，經過幾次，可惜餐牌選擇太少，沒有一次正式幫襯。某日，開會遲左，過咗午膳時間，近近地入去食個快嘅，飯餐60幾蚊，貴。於是食個茶餐， 40幾蚊，首先杯熱飲上枱，火都嚟埋，細杯到一啖就可以飲晒，不如比杯滾水客人算啦。跟住到個炒蛋麵包，所謂牛乳炒蛋，一上枱，可以話2成熟，嚇死人，同生雞蛋冇分別，依家咁嘅環境，真係唔夠膽食，好想叫佢拎返入去再煎熟d... 但係又怕加料⋯個瑞士汁雞翼撈公仔麵，好似放咗喺度四個鐘頭咁，隻雞翼好似中咗輻射甩皮甩骨，應該係浸左滷水超過10個鐘頭，公仔麵發脹到林啤啤，完全冇味道，就係靠嗰少少雞翼嘅滷水汁⋯真係唔會再幫襯，選擇已經少，理應貴精不貴多，只係兩三款嘢食都做到咁樣樣，價錢又唔平，附近工廠區嘅茶餐廳間間都好過佢，不了！