Les Saveurs Private Kitchen (Moved) New Location

蒞呢度食首先要留意價錢係每位 $788，主菜揀牛加$88，另加$88芝士拼盤，同埋留位要落訂作實。位處一個比較罨耷嘅商業大廈，上到去好似去咗大酒樓後門咁，跟住侍應就帶咗我哋入去一間(隔音)板間房，房入面都有幾張枱，相距唔算好遠，私隱度/空間感不足，不過入面果個煙花海景真係唔錯，聽到侍應同隔離枱講，除夕放煙花果啲日子，晨早book到full哂。雖然已經預先從短訊收到是日菜單，侍應仍然會好有心機咁介紹，加上因為是日材料新鮮情況作出嘅微調，然後問我哋揀咩。呢度嘅食物都比較精緻，睇住靚景靚食物就更係食得開心啲。食物方面點呢？佢用好多材料去造成一道菜，配搭基本上好和諧，無一樣嘢入口時感覺到有任何材料或調味搶咗鏡/口寡寡，除咗個湯嘅味定質地好似有啲過重。想特別一提，我頗喜歡那道慢煮三文魚，上枱夠花"腎"，肉質又剛剛好。不過總結一句，比成八百文，對於食物、環境、服務嘅期望都係高嘅，咁計佢算及格囉。