蜀客 (Closed)

最近K11 Musea進駐左一間新嘅川菜館，環境靚之餘仲可以望住維港夜景，坐得舒服之餘店員仲serve得好好！餐牌有各類型食物選擇，我地2人叫左4款咸食加2款甜品！呢度嘅餐前小食好出色，類似係鹹鹹甜甜嘅脆米！鮮椒海鮮匯，凍盤黎嘅，入邊有藍澳帶子、緬甸白蝦同迷你八爪魚，海鮮食落好爽口，鮮甜，加埋用香蔥芫荽碎、辣椒調成酸酸地嘅醬汁，惹味得來又開胃！紅燒皇子鴿，皮脆肉嫩，皮亦好薄！即叫即炸脆卜卜，而且可以鎖住啲肉汁的係裏面，好Juicy！酸菜桂魚，份量好大！裏面有兩斤半重嘅桂魚，仲有萵筍、芽菜等配料，湯頭亦都好清，唔似平時食開嘅酸菜魚咁油膩。食得出魚肉新鮮又厚身，飲埋啖湯覺得好足料，又唔會話太重口味，唔經唔覺就飲咗好多。萵筍同酸菜大大嚿，用料一啲都唔吝嗇。乾炒手撕包菜，熱辣辣，炒得好香好有鑊氣！啱晒送飯，絕對可以食到兩碗白飯！甜品方面叫咗酒釀湯丸同四川冰粉。酒釀湯圓有米香味，不過就用左芝麻湯圓嚟取代平時食嘅丸子，味道搶咗少少。四川冰粉夠消暑，上面仲加咗啲山楂片同花生碎添！整體來講，環境好舒服，雖然價錢唔平，但用餐滿足又有好服務，下次會帶埋其他朋友再嚟慶祝節日都不失為一個好選擇！