Butlery

Open Now

Now Closed

沙田其實真係一個好多好嘢食嘅地方，隨心走入一間餐廳都可以搵到寶藏。話就早幾日又響沙田，就同埋個同事食飯，「就呢間啦！」見到呢間叫做「Butlery」嘅餐廳裝修得幾靚，就入去食個午餐。我哋叫咗一份Set Lunch「煎澳洲穀飼西冷牛扒配燒薯仔及燒汁」跟咗一份「周打蜆湯」。估唔到碗湯比想像中更加香濃，濃稠嘅質感但有細滑嘅感覺。而西冷牛扒就肉質細膩、口感鮮嫩，上枱果陣油香四溢。「安格斯牛肉、楓葉漿煙肉 & 芝士漢堡」係我哋嗌嘅另一個菜式，厚厚嘅安格斯牛肉質感豐富、煙肉帶有微甜但不算油膩、醬汁亦好特別，將整個漢堡昇華。「酸忌廉牛油果醬薯條」，個醬汁調較得好好。令人停唔到口。我哋仲叫咗「朱古力奶昔」同埋「士多啤梨奶昔」，非常香滑可口。甜品方面，抹茶吉士醬厚班戟，配上紅豆、脆玄米同埋抹茶蕨餅。食落非常有層次，抹茶味濃、吉士醬香滑、厚班戟就軟綿綿，三樣加埋都好夾。總結呢間餐廳，裝修得精緻，好值得嚟打卡；同時食物質素超級好，再加上店員有良好嘅服務態度，呢間餐廳好值得收藏！