瑪麗蓮美國餐廳 (Moved) New Location

秋風起就特別易餓，又唔想坐鋪頭入面咁死固固，醒起有一段時間無幫襯〈因為這裡地方細，經常坐爆人〉，決定晚一點〈八時半後〉先去，唔使點等位可以坐門口，邊嘆住涼風陣陣邊嘆美食，乜都抵返晒！如果你未嚟過，見到套餐價錢可能會有點意外，唔係茶餐廳嗰回事，但坐落發覺咁多外國人嚟外賣拿走，之後到見到自己嗰order上檯就即刻明白，因為真係份量十足！唔係太餓的話，女仔人家分分鐘食唔晒要打包拎走。這晚胃口唔錯，決定叫個豬手套餐，因為之前見到有個上咗年紀，心想應該戒肥膩嘅伯伯，二話不說坐低就即刻叫咗同一個餐，佢絕對係對隻豬手念念不忘，食咗先算！而同一時間又有鬼佬落單要豬手外賣，心諗唔通真係好食得咁緊要？我之前鍾情佢地個ribs，係即場燒嘅，所以要等，但個醬汁極為惹味，食到坐街邊、啜晒手指做佢生招牌，我都唔mind，所以對隻豬手我下意識要求更高...個周打湯我唔詳述，又係見不斷有人外賣，無錯只係外賣一個餐湯〈其他地方除咗中湯，我未見過會賣走西湯囉！〉我的看法是這裡料多兼夠滑，不過份量偏細！沙律就都係嗰類嘢，性格欠奉。登！登！登！終於主角登場，嘩！重量級嘅豬手望落乾身，有少少焦，傍住一督薯泥，賣相百份百美國式。