沙拉姆咖喱屋

Open Now

Now Closed

我哋一坐低就每人叫杯芒果印度乳酪，都係要少甜少冰嘅，味道幾好。小食我哋就揀咗羊肉咖喱角，一份有四隻，我建議大家如果叫呢個真係一定要點佢提供的醬，佢個羊肉咖喱角本身味道唔錯，但係原來點咗醬之後再好食好多。我個friend揀咗個爐烤嫩雞卷，其實我心入邊有少少擔心，因為呢啲印度式嘅燒烤so far我食過咁多間都係麻麻地，不過呢一間竟然有驚喜，佢真係做到個雞肉表面有炭烤嘅燶燶地燒烤feel，但係入面嘅雞肉又真係做到嫩滑多汁，仲要用鐵板上熱辣辣，個廚師真係要好有心機煮先做到呢個效果。另外我哋仲叫咗個菠菜蓉燴印度芝士同埋咖喱羊肉，大家唔好睇過菠菜蓉燴印度芝士成兜綠色好肉酸，其實用嚟點naan bread都不知幾滋味，同埋啲印度芝士煙煙韌韌幾好食。咖喱羊肉唔會太辣，好重香料未，感覺就係好正宗嘅印度咖喱。雖然我哋得兩個人，但係我哋都叫咗兩份naan bread再加一份印度黃薑飯先至餸得晒啲咖喱羊肉同埋菠菜蓉燴芝士，過咗一個好滿足嘅印度之夜。