Video
Read full review
2024-11-10
771 views
大家都明白一個道理，期望過高會容易引致失望。開得店响中環，老蘭下面，鏞記燒鵝斜對面，仲要係日本有名大廚主理，我諗期望高都好正常姐。然而，基於人嘅思想習慣，低價嘅拉麵，例如 88 蚊碗，佢做到70/100分，你可能都會覺得 ok。但如果 158 蚊碗，佢做到 85/100 分， 你都可能會覺得不OK！呢間店我已經係二刷，第一次來無論係雞白湯拉麵定醬油拉麵，我都係覺得不太滿意，但因為全港較有名嘅拉麵店我都探過晒，所以想返兜一d之前睇落想試又未去試嘅拉麵，呢碗雞醬油拉麵就係其中一碗。以下係食評。《雞🐓醬油拉麵🍜》名店就係名店，令些多花神。呢碗麵一上桌，第一樣吸引到我嘅唔係碗麵，而係用來墊隻匙羹嘅羹墊，係雞造型，幾有趣喎，印象分有加，但冇影響我對碗麵嘅評價。香味 (4/5) - 香味充足豐富，第一種味道唔係醬油，而係柚子，因為佢篤柚子蓉就放响探頭落去最近鼻嘅位置，所以柚子味先來，然後先係醬油味。放柚子嘅位置可能係一種設計，亦可能係咁啱，但如果係呢種高檔店來講，姑且當佢係特登嘅先啦。湯 (3/5) - 如題，個湯非常咁多種唔同味道於一身。首先係鮮明嘅貝類味道，類似金色不如歸種貝湯咁。再來嘅味道就
大家都明白一個道理，期望過高會容易引致失望。開得店响中環，老蘭下面，鏞記燒鵝斜對面，仲要係日本有名大廚主理，我諗期望高都好正常姐。然而，基於人嘅思想習慣，低價嘅拉麵，例如 88 蚊碗，佢做到70/100分，你可能都會覺得 ok。但如果 158 蚊碗，佢做到 85/100 分， 你都可能會覺得不OK！呢間店我已經係二刷，第一次來無論係雞白湯拉麵定醬油拉麵，我都係覺得不太滿意，但因為全港較有名嘅拉麵店我都探過晒，所以想返兜一d之前睇落想試又未去試嘅拉麵，呢碗雞醬油拉麵就係其中一碗。以下係食評。
《雞🐓醬油拉麵🍜》
雞🐓醬油拉麵🍜
$158
0 views
0 likes
0 comments
香味 (4/5) - 香味充足豐富，第一種味道唔係醬油，而係柚子，因為佢篤柚子蓉就放响探頭落去最近鼻嘅位置，所以柚子味先來，然後先係醬油味。放柚子嘅位置可能係一種設計，亦可能係咁啱，但如果係呢種高檔店來講，姑且當佢係特登嘅先啦。
湯 (3/5) - 如題，個湯非常咁多種唔同味道於一身。首先係鮮明嘅貝類味道，類似金色不如歸種貝湯咁。再來嘅味道就係鰹魚味，應該係來自鰹魚汁，陣味都幾現成。再來就係柚子，味醂，同醬油本身個味。我並唔太鍾意呢個湯，唔係話唔好味，咁多美味嘅元素湊埋，又點會唔好味，但令到成個湯變左"攞你命三千"，硬湊各款元素於一身，冇左個味道嘅軸心，所以我真心麻麻地。
而，食到尾段時，最令我覺得有障礙感嘅唔係個湯太多味道，而係偏甜。個湯偏甜呢個問題，上次食醬油湯拉麵時我已經發覺，可能主廚認為夠甜，夠多味道，個湯嘅立體感先叫強呱。麵條 (4/5) - 太麵，小捲，偏黃，低加水。我記得上次來食，都係呢款麵，但上次唔知道咩原因，個麵煮得過硬，令我食到胃頂頂，今次來又冇呢個問題，個麵嘅軟硬度係剛好。麵條未身個小麥味算中等，食落都好食嘅，口感少煙韌。
配料 (3/5) - 雞叉燒方面，有兩款。第一款係雞脾肉。你睇睇下面幅圖，大概都知，點會唔好食吖。雞脾肉本身係嫩，調味正常，雞皮表面有燒過，所以香味，味道，口感都係好好。
再來係塊雞胸。口感嫩滑，不過雞味一般，淡淡地。
豬叉燒部份，明顯地係豬五花，薄切，黑椒調味鮮明，我認為算好食，但問題係佢可能切得太薄定點，一夾就散，好難可以完整地放入口，所以散收收咁食口感真係麻麻。
荀方面，果然係名店，選料有交代，用左穗先荀。穗先荀本身特別長，口感特別好，另外穗先荀本身係比較清甜。不過呢道嘅荀有個問題，佢荀味係夠，甚至乎去到有d荀臭味嘅程度，呢個未必人人啱。
溏心蛋方面，唔知係個廚失手定點，個蛋嘅質地，有d似擦膠咁硬。我睇過一本講拉麵歷史嘅書，當中提到，早期嘅拉麵，入面嘅蛋都係全熟同滷過，有d似台灣嘅鐵蛋咁，都係硬身。後來一路發展先越來越流行食口感軟滑嘅溏心蛋。咁，到底老闆係因為想立體到呈現返古早味，定純粹個廚今日失手呢？無論點，我都覺得個溏心蛋係敗筆。
唔差在，貼埋白蔥張相，正正常常。
整體 - 不推介。主廚可能想貫徹始終，無論個湯，同d配料，所有野都係偏甜。我本身對甜食係一般，佢甜嘅程度有d踩到我接受程度嘅底線。成碗麵，心機係夠，但風味同味道我都麻麻地。
Post
