氣日本料理 (Closed)

原本想同女友搵個睇到日落既地方食野，不過大部份都係新界地區，對於我依個「香港仔」來講實在太遠，所以揀左依間有海景睇既餐廳。之前未來過，所以都唔係好知個環境係點。原來係同髮型屋初初去到睇到只係坐左兩台人，諗住可以同女友靜靜地食返餐，點知撞正個日初四，個個來食團年飯，走既時候仲有好多人等緊位。我同女友先試左幾條串燒、有牛舌(原來想試和牛不過冇)、雞軟骨、白菌。用料質素唔錯，而且價錢唔貴(平均25蚊左右一串)，可能比出面更平。之後叫左個壽司拼盤($200蚊左右)，材料好新鮮，隻碟都好靚，不過見到美食開心過頭，食完先記得要影相..。我同我女友都係大食之人，少少串燒同拼盤又點會滿足到我地，之後再叫左個清酒煮硯同牛肉手打稻庭烏冬。清酒煮硯真係值得推介，時間剛剛好唔會煮得熟過頭，D硯新鮮又大隻，真係好好味~ 個手打烏冬實在係物有所值，烏冬口感好滑，牛肉入口即溶，完全唔似一般肥牛。最後仲試埋兩款甜品，心太軟同法式焦糖燉蛋，原來想食芝士餅，不過賣晒...甜品都唔駛多講，總之平靚正，無論賣相同質素都好有水準。唯一不滿係想試既幾款食物都冇，唯有希望下次試到。