狎鷗亭居酒屋

Open Now

Now Closed

居酒屋成日去，韓式嘅都係第一次☝️ 呢間喺香港開咗好多年，由韓國人主理，用英文溝通，食物款式眾多，而裝潢設計風格頗有特色，榻榻米座位，古舊圖畫，適合同朋友仔嚟小聚一下。前菜有六款，可以無限任添，有泡菜、菠菜、芽菜、甜魚仔、茄子同薯仔沙律。個人喜歡後三者，超級開胃，完全停唔到口，等緊菜上嘅期間已經Refill咗幾次，未開始食已經飽咗一半哈哈。店員推介生拌牛肉，據說係招牌菜。自問腸胃唔好，其實有少少怕，好在食完都無事。牛肉入口即化，超級嫩滑，調味適中，伴上梨絲同蛋黃，真係幾好味，絕對值得一試。香蔥炸雞好大份，雞翼、雞鎚、雞胸樣樣有齊，外層炸至金黃酥脆，唔油膩，夠乾身，咬落脆卜卜，咔咔聲、肉質有嫩有嚡，正常發揮。值得一讚嘅係個醬汁，鹹甜度啱啱好一定要點住食😆牛筋湯上枱時熱辣辣，湯底清甜，建議落鹽，牛筋份量比想像中多，口感偏軟嫩，骨膠原十足。飲品方面叫咗杯Highball，酒精度唔高，凍冰冰咁解渴又解熱，下次試埋其他款式。