越蘆越南牛肉粉

Open Now

Now Closed

每逢午餐時間已過、而晚餐又預咗要早食嘅話，都傾向嚟個輕食下午茶頂肚。輕食嚟講，呢間越蘆就係其中一個選擇，佢嘅湯河對我嚟講可以話係啱啱好頂肚又唔會太飽。今次食嘅係順化香茅豬扒湯粉配鮮雞湯，豬扒同湯粉係分開上，唔會令到豬扒俾湯浸淋曬，keep到豬扒嘅熱度同香脆口感。豬扒口感非常好，外脆肉嫩，唔鞋唔韌，入口易咬味道好。佢嘅湯粉除左粉外，仲有芽菜、蔥絲、乾蔥同九層塔。精萃係佢嘅湯底，平時我食麵多數唔飲湯，但佢嘅湯係其中一間我會一啖麵一啖湯咁食，而且飲完唔口渴。另外，佢仲有一碟仔嘅辣椒同1/4個青檸跟上，等你可以根據自己喜好調味。飲品方面都算多選擇，今次飲左熱話梅咸桔水，底係柑桔蜜，再加左一個青檸同一粒話梅，酸酸甜甜好醒胃，記得要攪匀先飲。餐廳多卡座位，坐得都算舒適。有一排嘅燈係用越南斗笠做裝飾，但得一排咁多，唔爹唔吊咁。