Video
Read full review
2013-06-26
111 views
啱啱返咗大陸山區做嘢成個星期咁滯，除咗返番入縣城外，晌啲小鎮小鄉例牌無啖好食，其實佢哋啲嘢唔差，只喺小弟唔嗜辣，唔多啱口味啫。一向晌回港當晚，都會食番餐好，正正就跟幾個食友約好依晚，嚟金牌小龍試試菜，幸好，航機無延誤（內陸航機延誤喺幾平常事），準時赴會。金牌小龍晌國內唔同省市都有不少分店，如廣州、深圳、北京、重慶、成都、福建……，而晌香港，銅鑼灣分店結業後，現只剩尖沙咀The ONE及新蒲崗Mikiki兩家分店。小弟之前未嚟過，所以，對其出品甚有興趣，今晚，就讓小弟風塵僕僕趕返嚟會一會依條過江小龍。一到店家門口，已擠滿唔少人等位，頗墟撼，幸得食友一早事事安排好，令小弟近乎撓埋兩手等食呀。室內裝潢簡約骨子，淺啡配杏色為主調，一室燈光柔和，餐廳中間喺一排又一排組合式二人枱，方便按人數多少變動，而最得歡心應該喺兩側嘅卡位，椅背較正常高出好多，更加不被前後食客騷擾，可惜就容納唔到我哋6個人咁多。翻一翻餐牌，印刷好精緻，每款食物有晒編號、價錢，食物名稱有齊中英日文對照，兼且圖文並茂，令人睇落非常清楚。整個餐牌，大致分為11類：點心類、小食類、餛飩類、特色小炒類、蔬菜類、湯類、拌麵類、湯麵類、炒飯
一到店家門口，已擠滿唔少人等位，頗墟撼，幸得食友一早事事安排好，令小弟近乎撓埋兩手等食呀。室內裝潢簡約骨子，淺啡配杏色為主調，一室燈光柔和，餐廳中間喺一排又一排組合式二人枱，方便按人數多少變動，而最得歡心應該喺兩側嘅卡位，椅背較正常高出好多，更加不被前後食客騷擾，可惜就容納唔到我哋6個人咁多。
翻一翻餐牌，印刷好精緻，每款食物有晒編號、價錢，食物名稱有齊中英日文對照，兼且圖文並茂，令人睇落非常清楚。整個餐牌，大致分為11類：點心類、小食類、餛飩類、特色小炒類、蔬菜類、湯類、拌麵類、湯麵類、炒飯類、特色甜點類、酒水。每一類都三五七樣或十多樣，所以都令人幾心猿意馬，總喺樣樣都想試！此外，補充一啲參考資料：茶位$7，另收加一，而切餅費每個$100，開瓶費每瓶$150。點菜好簡易，剔好張點菜紙，交番比侍應就可以！先講講點心類，一共有17款之多，我哋揀咗其中4款一試：蟹黃小籠包、香菇花素蒸餃、韭王鍋貼及筒仔米糕。當然仲有其他款式想試，如蔥燒包，只好留返再嚟再試。
蟹黃小籠包 $66（6個）
小籠包放晌墊有白布嘅蒸籠內，代替慣常嘅花餅紙，環保之餘減低被紙黐住嘅影響。外皮感覺有啲厚，所以夾起時個小籠包未有吊湯之狀，雖然標榜有19摺以上，但驟眼所見，摺紋未見幼細。不過，咬開依然挺爆汁，以豬後腿肉做餡，味道鮮美，唔肥膩，口感唔錯，略嫌蟹粉味未夠突出，有啲似有還無嘅感覺。
香菇花素蒸餃 $48（6個）外型摺得幾靚，餃邊摺紋清晰，而外皮下隱約透出翠綠。顧名思義，內餡包括菇及菜，最欣賞喺菇粒同菜末都刴得幼細，食落感覺爽口清香。
韭王鍋貼 $39（6隻）一底6隻嘅鍋貼煎得香脆，內裡填滿豬肉及韭王，比例啱啱好，既有肉香，又有韭王清爽，怪唔之得喺店內嘅「金牌」推介。
筒仔米糕 $28台灣地道小食，筒仔米糕外型圓碌碌，因為好似竹筒飯咁，以竹筒做模蒸煮而成，賣相亦頗精緻。米糕其實喺糯米嚟，加入冬菇粒、蝦米、肉碎，加點滷汁蒸煮，米糕煙煙糯糯，伴點甜辣醬，又真喺幾好食。
菜肉餛飩湯 $35跟住要試喺餛飩類，依個類別有6款，分別喺菜肉（或蝦肉）餛飩湯、乾拌菜肉（或蝦肉）餛飩、菜肉（或蝦肉）紅油抄手，我哋試咗個較清淡嘅菜肉餛飩湯。一客有6大粒，餛飩皮挺薄，入口幾滑溜，菜多肉少，所以入口較為清淡。不過，個賣相真認真麻麻，清湯底，加幾條粗紫菜絲、蛋絲。
三杯雞 $58唔好淨喺諗住金牌小龍得點心、麵食，特色小炒亦唔少，10款小炒中睇中三杯雞，因為都喺一款出名嘅台灣菜。很認同食友嘅描述，雞件食起嚟既滑且嫩，而且，味道濃郁惹味，值得推薦嘅小炒。
炸醬拌麵 $33拌麵類一共有5款，包括台式擔擔撈麵、台式麻醬撈麵、蕃茄蛋拌麵、油蔥拌麵、炸醬拌麵，款款都喺$33碗。麵嘅份量確實不少，幾個人分享就最多不過。將麵條跟炸醬、青瓜絲、蔥粒拌勻，入口感覺濃香嘅肉燥中有點點清爽，麵條柔滑，掛滿醬汁夠晒滋味。
蕃茄蛋伴麵 $33又喺另一款適合夏天嚟食嘅開胃伴麵，其實唔晒多講大家都領會到個味道，酸甜甜嘅蕃茄蛋倒得滿滿，蕃茄味酸香鮮活，蛋亦炒得唔老身，食完更開胃！
今晚，小食類、蔬菜類、湯類、湯麵類、炒飯類依幾款就無嗌到，其實一樣有好多選擇。去到尾聲，自不然輪到特色甜點類，一口氣點咗3款齊齊分享。迷你豆沙包 $27（3個）
一籠3個豆沙包，的的骰骰，不厚不薄嘅外皮包住滿滿嘅豆沙餡，豆沙味道清香不俗，又唔太甜，不過小弟都喺當佢喺個包點大於一件甜品。
迷你芝麻包 $27（3個）再嚟就輪到迷你芝麻包，又奇怪喎，個芝麻包咬落個包身比個豆沙包鬆軟，而且啲芝麻餡炒得頗香，所以，今晚鍾意個芝麻包多啲。
赤豆鬆糕 $28反而小弟對鬆糕類就麻麻，唔喺唔食，只喺唔會主動揀啫。講開赤豆，曾經有個小小美麗誤會，誤以為喺赤小豆，查實喺紅豆。鬆糕食起嚟煙煙韌韌，完全跟我哋廣東嘅鬆糕喺兩樣嘢，內裡散佈清甜紅豆，至於糕面嘅紅紅綠綠，有啲會用紅、綠青瓜，有啲會用紅、綠櫻桃嚟做，不過裝飾大於味道。
酸梅汁原價$14，依家推出震撼價$9，足足打個65折，非常之抵，無理由唔嗌番杯啫，此外凍、熱豆漿、凍檸賓都喺做緊震撼價。雖然賣$9，一樣斟得大大杯，酸梅味唔錯，又凍凍哋，份外清爽！
綜觀今餐晚飯，水準屬OK之上，只喺部份食物有啲參差，未達期望，或者食嚟覺得有啲普通。不過，以尖沙咀，仲要晌大商場之內，覺得價位上仍相對便宜，服務又唔錯，若揀正卡位又好坐，所以，鬆手少少俾個笑面佢。故此，如果想嚟到食得稱心，就先參考一眾食評篩走一啲味道或款式都較為普通嘅菜式喇！
Post
