kikusan

Open Now

Now Closed

同朋友差不多一年無見，今日終於約去新城市廣場食飯，想揾間無咁多人又可以坐得偏遠啲嘅餐廳傾下計。晚上7點左右，眼見好多餐廳都有七八成滿，而只有呢間係相對仲有好多位。攪咗成幾分鐘先入座，唔係因為要等位，而係職員應承咗畀你坐嘅枱突然安排咗畀一家七口，終於擾攘咗一輪先安排倒相對安靜嘅座位畀我哋。餐牌選擇唔多。我哋兩個人叫咗豬肉小籠包、紅油抄手(辣)、綠茶流心包、素鵝同千層吉列豬扒飯。小籠包上枱熱辣辣，皮薄多汁，都好味嘅。不過要我哋提先記得畀薑絲醋。紅油抄手嘅辣係麻辣，有別於喺酒樓食倒嘅甜辣。小小麻小小辣，個人覺得幾特別、令人開胃。綠茶流沙包好流心，不過就全部都係油啫。啲油仲要唔係牛油(因為無香味)，明顯係攪個流心餡唔夠均勻，油水分離，食到成口油、又膩。素鵝就正正常常，個腐皮煎得好脆。素菜餡，配埋個浙醋，唔錯。呢間走淮揚風味及路線嘅餐廳，做得最好食嘅竟然係千層吉列豬扒飯呢啲咁日式嘅食物。千層我就無辦法睇倒，但係個脆皮好薄好脆、一啲都唔膩。啲滑蛋都好正，令倒個飯濕濕地，好易入口。我去食嗰期，用恒生咭簽賬有九折優惠。