三清洞摩西 (Closed)

唔知大家有無食過真正位於首爾三清洞既原店，果間日日排長龍，不斷有傳媒到訪。不但止好好味，仲好平，同香港既部隊鍋味道差天共地。一開始知道香港開舖，抱太大期望，始終會失望。職員唔識廣東話，英文亦唔太好，指手劃腳，搞左好耐總算溝通到點咩野食。六個女仔，乜都可以試晒。老實講，材料不外乎年糕、魚片、午餐肉、餃子、芝士、辛辣麵、粉絲等等，全部醃制或者現成既食材，無烹調技巧可言。重點在於個鍋既湯底，正宗版唔會好濃稠但已經入味，相反香港版比較稀，而且湯底只有稀釋韓式辣醬既味道。部隊鍋看似簡單，但有無用真材實料，係食得出既。最後當然唔少得既係芝士炒飯，飯焦唔錯。廚房炒好，眼見用料有芝士同紫菜，但如果好似正宗版，用頭先食完部隊鍋既醬汁即炒，味道應該更為豐富。