品潮軒 (Closed)

～～我哋兩老好鍾意食大大隻涷花蟹，兩斤至少就最好，想翻起都會即刻流口水！但係要揾到閒時都有幾隻巨型花蟹、掛喺度等人叫嘅潮州酒家，我諗都唔會有好多間。不過，咁大隻嘅蟹，始終都係一個 pricey dish，酒家都唔會大量入貨，有機會食倒都係緣份嚟㗎。最近喺『品潮軒』就好好彩可以嘆到一隻近乎完美嘅涷花蟹，二斤多，興奮兼滿足！太座仲得米，𡁻哂兩隻大蟹拑！佢開心，我開心啦！跟住老闆「Dee 哥」仲介紹咗我哋試咗佢哋嘅「酥炸荔芋帶子盒」，我哋食蟹食到咁上下，厨房先開始炸，出到嚟熱辣鬆脆，帶子又鮮嫩多汁，滿分！當晚『品潮軒』雖然滿座，但係招乎一啲都唔馬虎，非常體貼。真係不枉我哋長途跋涉走過嚟九龍城！如果大家都喜歡食大涷蟹，仲可以去『尚興』同『新光』，但係價錢都會比『品潮軒』價啲。至於同區嘅『創發』就⋯⋯個 dining experience 完全唔得，學我個死黨話齋：「洗多多錢，都唔開心！」