鴨仔冰室

Open Now

Now Closed

上次和媽媽去食漢堡包路經此店，發現依間西餐廳食物吸引價錢唔貴，仲有得食鐵板鋸下扒，又好似唔錯喎，所以今晚到來食下。此店位於鴻圖中心內的愛琴坊正中位置，見有小黃鴨好易認。餐廳環境唔錯有沙發位坐，播放著外語歌甚有氣氛。餐牌只有兩頁紙但菜式都有十多款選擇，以套餐形式供應包飲品餐湯或沙律，價錢一百左右仲免加一，晚市西餐來說非常經濟吸引。招牌西冷牛扒 $158大大塊的西冷牛扒有點厚度份量十足，肉質軟腍不韌肉味濃，鐵板熱烘烘淋上惹味的黑椒汁冒起大煙香噴噴，意粉口感彈牙煙韌，配菜新鮮，整體味道不錯，非一般的快餐鐵板級別。海鮮燴飯 (蟹肉,蝦,藍青口) $88飯粒飽滿粒粒分明，蕃茄汁唔太酸開胃好味，每粒飯都好掛汁入味，配料十足都好慷慨，好多蟹肉絲，撈埋飯增加了口感和咸鮮味，藍青口三粒細粒鮮甜爽口，大蝦三隻爽口彈牙無雪味，唔駛一百蚊的risotto相當抵食好味。松露蘑菇湯(跟餐)蘑菇打碎混入湯內，每啖都有碎粒粒口感好實在，加上松露的菇菌香味四溢，非常好飲，超讚。沙律(跟餐)普普通通標準沙律菜，材料新鮮醬汁較少。飲品(跟餐)凍檸水和熱奶茶味道一般，正正常常。