尋魚記 (Under Renovation)

上次食過好食當然要返尋味。放工就同屋企人一共四人去食。今次見到有蟹產品，就叫咗蟹粉扒豆腐，豆腐香滑，配蟹粉好惹味，送飯一流。所以專登叫咗個炒飯，松子菜粒炒飯，清清哋，有菜有松子，配餸食又得，就噉食又唔寡。松子大黃魚同韭黃炒鱔糊係媽咪必食嘅，魚表面脆卜卜，肉嫩，再加埋菠蘿、蝦仁、甜酸汁真係停唔到口，每次食都唔會厭。炒鱔糊都係正常水平，惹味得嚟唔鹹，就咁食都可以。蒜蓉時蔬-花菜，即係椰菜花，有啲蒜吊味。食完松子魚濃味再食返啲菜，balance返，唔會樣樣嘢都好濃味，但又幾好味。之後就食砂鍋雲吞雞，湯有雞味，唔會好鹹，雞肉正常嫩滑，雲吞足料飽滿。最後就叫咗2款甜品，都係經典款式：高力豆沙、豆沙鍋餅。不過食高力豆沙就要小心啲，因為都幾熱下，不過唔熱又唔好食。個包（唔知係咪咁叫）都鬆軟，豆沙多啲就perfect。豆沙鍋餅就正常，外脆內甜。當晚唔算好多人，坐得幾舒服，侍應服務都幾周到，舉手示意就好快來幫忙。