寶寶雞煲 (Moved) New Location

今日在太子基隆街搵到一間性價比極高、火鍋材料新鮮又好味嘅雞煲店，就係寶寶雞煲了。嚟呢度食主要係好想食雞煲，於是我哋一行三人就叫左一個寶寶奇味雞煲，我哋揀咗半隻嘅走地雞。走地雞嘅肉真係好結實，口感非常好，而且雞肉比較瘦，啱我口味。呢度嘅雞煲係干煲，但個汁非常夠味，非常香，所以食到唔停口，我哋叫咗小辣，好惹味。半隻雞嘅肉都唔少，但由於真係好好味，所以有啲開胃，仲有胃口叫多幾樣火鍋材料打邊爐。食完雞煲，店員就主動幫我地加湯，準備火鍋。我哋叫咗八款材料，新款都係超水準。芝士丸彈牙、韭菜餃皮薄饀靚、鴨血非常滑、韓國薯仔麵口感一流、粟米新鮮、紐西蘭蚌隻隻都大隻飽滿。當中我感到最驚喜嘅就係炸魚皮和手打蝦丸，佢嘅魚皮比較薄身，非常脆，仲要係新鮮炸出嚟，食落去仲係熱㗎。手打蝦丸我認為係必點食品，因為佢啲蝦丸係真材實料，你係見到同食到大大嚿嘅蝦肉，而且啲蝦肉係極度極度彈牙，真係好正啊！