阿爺八鮮鍋 (Closed)

今晚book定枱同家人到阿爺八鮮鍋試下，家人鐘意食海鮮，充滿期待。準時7點到達餐廳，職員安排我地坐位於入口的枱，位置雖然唔係太好，但好處係容易揾職員，同埋有需要時自己可以攞餐牌 (呢點稍後解釋)。任食火鍋 (除咗某些食物) 為時2.5小時，45分鐘前截order。我地揀咗海鮮及麻辣湯底，開始時先送上雞煲，可以揀兩款味道。雞煲夠入味，可以再添。食完雞煲就可以正式火鍋，需要向職員攞餐牌，每次可以叫6款食材 (所以坐近門口都有好處)。海鮮如鮑魚，蟶子王，海花甲等都好新鮮，而蟹及蝦亦唔錯。除海鮮外，新鮮滑牛肉一定要試！其他幾款的餃子其實都好味，推介可以試下。尚有丸類及菜的選擇，雖然整體的食材好似比其他任食火鍋少啲，但我會認為貴精不貴多。職員的服務效率都算高，會盡力幫忙。