小曼谷泰國美食 (Moved) New Location

來九龍城食泰國菜，小曼谷都一定係心水選擇之一，菜式夠正宗又好味。今日食的係城南道分店，都幾多人，最好都提早訂位。餐廳門口的搶眼的黃色招牌係特式之一，在遠處就可以見到。餐廳入面環境裝修簡約，都以黃色為主，牆身係黃色，連餐具都係，配合主題，有心思。一坐低先叫咗兩個椰青，$37/個，新鮮即開，椰青水清甜可口，有淡淡的清澈香味，椰子肉夠嫩滑。香草辣椒炒河，牛肉，$69,材料豐富，有青椒，豆角，本菇等一齊炒，香味四溢，食落唔會太辣，河粉夠透明煙韌，有少少似啫喱的質感，入口爽滑，牛肉切片炒得入味，係必叫之選。蒜香辣椒炒大頭蝦，$178,用爆香的蒜蓉加辣椒一齊炒勁入味，有兩隻大大隻的大頭蝦開邊，蝦肉彈牙鮮甜，鮮味中帶有少許辣度，味道富有層次，蝦頭仲有好多紅色的蝦膏，蝦味濃郁。明爐酸辣煎烏頭，$158, 煎過的烏頭會可以辟腥，紅色的湯底味道頗辣，香味撲鼻，魚肉食落又唔會過辣，反而嫩滑鮮甜，少少結實而又唔會鬆散，點住微辣的酸辣湯底食真係越食越滋味呀。