恩記茶餐廳

Open Now

Now Closed

今日我們元朗八鄉附近做完嘢之後，行過錦田上村見到呢間係用可口可樂做主題嘅「恩記茶餐廳」，所以作為超級可樂迷嘅我們，當然要影相打卡一吓兼食個下午茶！喺諗緊叫啲咩食嗰陣，我突然諗起呢度會唔會有窩蛋免治牛肉飯？因而家好多茶餐廳嘅免治牛肉都變成西式嘅肉醬，但呢度竟然仲係中式人手剁嘅鮮免治牛肉加青菜，所以我們就即刻叫咗嚟食，出到嚟果然無令我們失望，免治牛肉非常鮮嫩軟滑，肉味亦相當香濃，再撈埋窩蛋一齊食，質感更加滑溜，真係超正呀！豬扒包嘅包質係我們最讚賞嘅一點，因質感係非常軟熟，而且完全無「硬實實」嘅感覺，而豬扒就煎得色澤好金黃香口，肉質亦相當鬆化！魚蛋麵嘅麵質超煙韌彈牙，而魚蛋亦相當爽口彈牙，最好就係無乜魚腥味，正呀！喺差唔多食完嘅時候，我們先發現他們有外賣專車，車上印有他們嘅招牌七彩飯，感覺好似好專業兼呢個招牌飯應該唔錯，所以我們要另外再搵日嚟食吓先得！