金記冰室 (Closed)

呢一日黎到近鵝頸街市既金記冰室食飯。呢間冰室係銅鑼灣同灣仔地鐵既中間，行過黎大概十五分鐘。黎到比我既第一印象係裝修都幾靚，一啲都唔似開左好多年。 第一樣試既係佢既中式南瓜湯；飲落好香南瓜味，而且咸度適中，令人想再encore. 呢度既招牌菜係農夫包，於是我地叫左咖哩牛腩一口包($89)，其實係喺個農夫包裏面放左啲飯同咖哩牛腩一齊焗，切開個包之後再點佢附上既咖哩汁一齊食。咖哩汁好香好濃，塊包點少少汁就已經好夠味；啲牛腩煮得夠稔，而且好香牛肉味；啲飯令成個小菜變得特別飽肚，但唔算特別好食。 我地又食左焗芝士海鮮飯($51)，裏面除左芝士汁，主要仲有魚同魷魚，兩樣都係我好鍾意食既，幾樣嘢夾埋好相襯，尤其係個魷魚好juicy. 跟住叫左個金銀蛋香蒜浸時蔬($68)，啲白菜幾新鮮，比較淡口再夾上啲咸蛋同皮蛋剛剛好，之前食左啲濃味既嘢而家清清個喉嚨都唔錯。最後貪新鮮叫左個保衛爾牛肉汁，因為之前未聽過又想試下。飲落咸咸地又苦苦地，唔係好接受到個味，飲左三啖就放棄左。之後聽同事講返保衛爾原來係個牌子名，細個會飲多啲，好暖胃，佢細個有時會送粥食，不過我就不敢恭維啦……