尚上下夏2.8 - 養生雞煲火鍋x冰室 (Closed)

尚上下夏（灣仔）今日放工阿女約咗我食晚飯，原來佢帶我過嚟灣仔嘅尚上下夏打邊爐。我哋首先食咗個雞煲先，食完雞煲就轉湯底打邊爐。餐廳環境光猛，坐落舒服，而且冷氣夠大，打邊爐都唔會好熱。雞煲（半份）$178因為我哋兩個都唔太食得辣啦，所以叫咗走辣。雖然走咗辣，但係雞煲仲有啲麻味，特別惹味。而且雞煲有大量芫荽，好香。雞煲好多雞件，沾滿雞煲醬，好入味。雞肉嫩滑，肉質爽彈。瑤柱群翅雞湯$53雞湯好鮮甜、好濃郁。湯底已經有雞件，仲有瑤柱同群翅，飲落份外滋潤，用呢個湯底嚟打邊爐確實唔錯！手切頂級安格斯$198安格斯牛肉份量都幾多，牛肉油花分布平均，食落肉味濃，質地嫰口，唔會韌。鬼馬墨魚$38 鬼馬墨魚原來係油炸鬼配墨魚滑。整體食落非常香脆，墨魚滑鮮甜彈牙。餃子拼盤$43 餃子拼盤分別由鮮蝦雲吞、韭菜豬肉餃同魚皮餃，每款分別有兩粒。雲吞有好大粒鮮蝦，好新鮮，好彈牙。韭菜豬肉餃好香韭菜味。手打三色滑$108 三色滑有墨魚滑、蝦滑同雞滑。蝦滑充滿蝦肉，質地彈牙。雞滑好特別，我第一次食，除咗雞肉味濃，質地都幾爽彈。